काठमाडौं । डोनाल्ड ट्रम्पले इरानसँगको वार्ता निष्कर्षविहीन भएपछि पनि आफू चिन्तित नभएको बताएका छन्।

शनिबार पाकिस्तानमा भएको अमेरिका-इरान वार्तापछि ह्वाइट हाउस बाहिर पत्रकारहरूसँग कुरा गर्दै ट्रम्पले युद्धको अवस्था अमेरिकाको पक्षमा रहेको दाबी गरे।

उनले इरानविरुद्धको सम्भावित सैन्य अवस्थाबारे बोल्दै अमेरिका बलियो स्थितिमा रहेको उल्लेख गरे। “हामी जित्नेछौँ,” ट्रम्पको भनाइ उद्धृत गर्दै अन्तर्राष्ट्रिय सञ्चारमाध्यमहरूले जनाएका छन्।

ट्रम्पले इरानी नौसेनाको क्षमतामाथि प्रश्न उठाउँदै उनीहरूसँग रहेका १५८ जहाजमध्ये धेरैजसो नष्ट भइसकेको दाबी गरे। साथै, २८ वटा माइन ड्रपरहरू पनि डुबिसकेको उनको भनाइ थियो।

उनका अनुसार केही समुद्री माइनहरू अझै पानीमा बाँकी हुन सक्ने भए पनि अमेरिकी माइन स्वीपरहरू सक्रिय रूपमा परिचालित छन्। यस अभिव्यक्तिले अमेरिका–इरानबीचको तनाव अझै चर्किँदै गएको संकेत गरेको विश्लेषकहरू बताउँछन्।