काठमाडौं । सरकारले देशभरका शैक्षिक संस्थामा नयाँ शैक्षिक सत्र २०८३ साल वैशाख १५ गतेदेखि सुरु गर्ने निर्णय गरेको छ। आइतबार बसेको मन्त्रिपरिषद् बैठकले उक्त निर्णय गरेको हो।

सरकारका प्रवक्ता तथा शिक्षा मन्त्री सस्मित पोखरेलका अनुसार आगामी शैक्षिक सत्र निर्धारित मितिबाट सञ्चालनमा आउनेछ।

त्यसैगरी, मन्त्रिपरिषद्ले सरकारी कार्यालय तथा शैक्षिक संस्थामा सातामा दुई दिन बिदा दिने निर्णय पनि गरेको छ। अब शनिबार र आइतबार सार्वजनिक बिदा हुनेछ।

इन्धन खपत घटाउने र प्रशासनिक कार्यलाई व्यवस्थित गर्ने उद्देश्यले दुई दिने साप्ताहिक बिदा लागू गरिएको सरकारको भनाइ छ। साथै, सरकारी कार्यालयको समय बिहान ९ बजेदेखि साँझ ५ बजेसम्म कायम गरिएको छ।

सरकारको यो निर्णयले शैक्षिक गतिविधि व्यवस्थित बनाउने तथा कर्मचारी र विद्यार्थीको कार्य–जीवन सन्तुलन सुधार गर्ने अपेक्षा गरिएको छ।