काठमाडौं । काठमाडौं मा ‘सानुभाइ’ उपनामले चिनिने युवराज गुरुङ लाई प्रहरीले पुनः पक्राउ गरेको छ। गुण्डागर्दीमा संलग्न रहेको आरोपमा उनलाई नियन्त्रणमा लिइएको प्रहरीले जनाएको छ।

प्रहरीका अनुसार गुरुङ यसअघि पनि पटक–पटक पक्राउ पर्ने र धरौटीमा छुट्ने गर्दै आएका व्यक्ति हुन्। रमेश थापाका अनुसार पछिल्लो समय पनि उनी आपराधिक गतिविधिमा संलग्न रहेको सूचनाका आधारमा पक्राउ गरिएको हो।

यसअघि २०८० साल असारमा ठमेलस्थित क्लब ओम्निया का सञ्चालकमाथि कुटपिट गरेको आरोपमा पक्राउ परेका गुरुङलाई प्रहरीले हत्कडीसहित सार्वजनिक रूपमा बजार घुमाएको थियो। उक्त घटनापछि जिल्ला प्रशासन कार्यालय काठमाडौंले उनलाई अभद्र व्यवहार मुद्दामा १० हजार रुपैयाँ धरौटीमा रिहा गरेको थियो।

प्रहरी रेकर्डअनुसार गुरुङ कुख्यात गुण्डा नाइके कुमार घैंटे को समूहका सदस्य थिए। २०७२ सालमा घैंटे प्रहरी मुठभेडमा मारिएपछि गुरुङ अझ सक्रिय बनेको प्रहरीको भनाइ छ।

त्यस्तै, २५ पुस २०७२ मा नुवाकोटबाट अवैध हतियारसहित पक्राउ परेका गुरुङ विभिन्न आपराधिक घटनामा संलग्न रहँदै आएको प्रहरीले जनाएको छ। २०६७ मा गोंगबु क्षेत्रमा भएको धारिलो हतियार प्रहार, २०७६ को बैंकिङ कसूर, २०७७ मा पेस्तोल देखाएर कुटपिट र २०८२ मा ठमेलमा झगडा लगायत घटनामा उनको संलग्नता देखिएको छ।

प्रहरीले गुरुङमाथि थप अनुसन्धान भइरहेको जनाएको छ।