भक्तपुर । भक्तपुर मा सार्वजनिक शान्ति सुरक्षालाई मजबुत बनाउन जिल्ला प्रहरी परिसरले सञ्चालन गरेको ‘स्वीप अप्रेसन’का क्रममा ६० भन्दा बढी व्यक्ति पक्राउ परेका छन्।

जिल्ला प्रहरी प्रमुख सूर्यबहादुर खड्का का अनुसार शनिबार राति गरिएको उक्त अप्रेसनमा विभिन्न शंकास्पद गतिविधिमा संलग्न व्यक्तिहरूलाई नियन्त्रणमा लिइएको हो। पक्राउ परेकामाथि आवश्यक अनुसन्धान गरी कसुर अनुसार मुद्दा दर्ता गरिने उनले जानकारी दिए।

प्रहरीले ठिमी र जगाते प्रहरी वृत्तसहित जिल्लाका विभिन्न प्रभाग तथा युनिटहरू परिचालन गरी अभियान सञ्चालन गरेको जनाएको छ। सार्वजनिक स्थलमा होहल्ला गर्ने, शान्ति भंग गर्ने, लागूपदार्थ सेवन गर्ने तथा समूहमा बसेर अवाञ्छित गतिविधि गर्नेहरूलाई लक्षित गरी कारबाही गरिएको प्रहरीले बताएको छ।

प्रहरीका अनुसार नजिकिँदै गरेको बिस्केट जात्रा लाई शान्तिपूर्ण, सुरक्षित र व्यवस्थित रूपमा सम्पन्न गराउने उद्देश्यले यस्तो अप्रेसन सञ्चालन गरिएको हो।

स्थानीय प्रशासनले सर्वसाधारणलाई नियम पालना गर्न र शान्ति सुरक्षामा सहयोग गर्न आग्रह गरेको छ।