काठमाडौं । केपी शर्मा ओलीलाई पक्राउ गरिएको विरोधमा आन्दोलनमा उत्रिएका नेकपा एमालेका कार्यकर्तामाथि प्रहरीले लाठीचार्ज गरेको छ। घटनामा केही नेता तथा कार्यकर्ता घाइते भएका छन्।

माइतीघर–बबरमहल क्षेत्रमा प्रदर्शन भइरहेका बेला एक समूह सिंहदरबारको दक्षिण गेटतर्फ अघि बढ्न खोजेपछि प्रहरीले हस्तक्षेप गर्दै लाठी प्रहार गरेको हो। प्रदर्शनकारीका अनुसार प्रहरीको लाठीचार्जका क्रममा उनीहरूमाथि अन्धाधुन्ध बल प्रयोग गरिएको थियो।

घाइते हुनेमध्ये काठमाडौं महानगरपालिका–१ का युवराज ओली गम्भीर रहेका छन्। उनको टाउकोमा लाठी लागेर रगत बगेपछि उपचारका लागि अन्नपूर्ण न्यूरो अस्पताल लगिएको जानकारी दिइएको छ।

प्रदर्शनकारीहरूले पक्राउको विरोध गर्दै शान्तिपूर्ण प्रदर्शन गरिरहेका बेला प्रहरीले बल प्रयोग गरेको आरोप लगाएका छन्। यद्यपि, घटनाबारे प्रहरीले औपचारिक प्रतिक्रिया सार्वजनिक गरेको छैन।