काठमाडौं । इरानसँग बढ्दो तनावबीच अमेरिकाले खाडी क्षेत्रमा सैन्य उपस्थिति विस्तार गरेको छ। कूटनीतिक प्रयास जारी रहे पनि क्षेत्रीय सुरक्षा अवस्था झन् जटिल बन्दै गएको देखिन्छ।

अमेरिकी रक्षा मन्त्रालयले ८२औँ एयरबोर्न डिभिजनअन्तर्गत करिब दुई हजार सैनिकलाई खाडी क्षेत्रमा परिचालन गर्ने निर्णय गरेको अन्तर्राष्ट्रिय सञ्चारमाध्यमहरूले जनाएका छन्। उक्त डिभिजन छिटो परिचालन गर्न सकिने तथा आकाशमार्फत् प्यारासुटबाट उत्रिन सक्ने विशेष क्षमतायुक्त बल हो। यसअघि नै अमेरिकी मरीनका दुई टुकडी उक्त क्षेत्रमा खटाइसकिएको छ।

यसैबीच, इरानका सभामुख मोहम्मद बाकर गालिबाफले छिमेकी देशहरूलाई लक्षित गर्दै कडा चेतावनी दिएका छन्। उनले कुनै पनि देशले अमेरिकालाई इरानी भूभाग, विशेषतः टापुहरू कब्जा गर्न सहयोग गरेमा त्यस देशमाथि प्रत्यक्ष कारबाही गरिने बताएका छन्।

विशेषगरी खार्ग टापु लाई लिएर तनाव बढेको छ। यो टापु इरानको प्रमुख तेल निर्यात केन्द्रका रूपमा चिनिन्छ र रणनीतिक दृष्टिले अत्यन्त महत्वपूर्ण मानिन्छ। केही विश्लेषकहरूले इरानको चेतावनी संयुक्त अरब इमिरेट्सतर्फ लक्षित हुन सक्ने अनुमान गरेका छन्, यद्यपि इरानले कुनै देशको नाम स्पष्ट रूपमा उल्लेख गरेको छैन।

त्यसैगरी, इरानले आवश्यक परे बाब अल-मन्देब जलडमरूमध्यमा नयाँ मोर्चा खोल्न सक्ने संकेत दिएको छ। यो मार्ग रेड सागर र एडेन खाडी जोड्ने महत्वपूर्ण समुद्री नाका हो, जहाँबाट विश्वको ठूलो परिमाणमा तेल तथा ग्यास ढुवानी हुने गर्दछ।

विशेषज्ञहरूका अनुसार, उक्त क्षेत्रमा कुनै पनि अवरोध उत्पन्न भएमा एशिया–युरोप व्यापारमा प्रत्यक्ष असर पर्नुका साथै विश्वव्यापी ऊर्जा संकट गहिरिन सक्ने जोखिम छ।

हाल कूटनीतिक पहलहरू जारी रहे पनि तीव्र बन्दै गएको सैन्य गतिविधिले क्षेत्रीय शान्तिको सम्भावना थप अनिश्चित बनाएको छ।