भक्तपुर । केपी शर्मा ओलीले प्रतिनिधिसभा निर्वाचनको परिणामले समाजमा राजनीतिक, सांस्कृतिक र सामाजिक विचलन ल्याउने बताएका छन्। उनले अहिलेको अवस्था समाजलाई ‘नेगेटिभ’ (नकारात्मकता) तर्फ उन्मुख गरिरहेको दाबी गरे।

नेकपा एमालेका अध्यक्षसमेत रहेका ओलीले आफ्ना बुबा स्वर्गीय मोहनप्रसाद ओलीको काजक्रिया गरिरहेका बेला उनलाई भेट्न पुगेको प्रेस चौतारी नेपालको टोलीसँग यस्तो प्रतिक्रिया दिएका हुन्। भेटघाट भक्तपुरको गुण्डुस्थित निवासमा भएको थियो।

पत्रकारहरूसँगको अनौपचारिक कुराकानीमा उनले सामाजिक सञ्जालप्रतिको बढ्दो निर्भरता पनि चिन्ताजनक रहेको उल्लेख गरे। ‘हामी आफ्नो दिमागभन्दा बढी मोबाइलको दिमागले चलिरहेका छौँ,’ उनले भने, ‘कुनै ठाउँमा पुग्यौँ भन्ने कुरा फोटो हालिसकेपछि मात्र सोच्ने अवस्था भएको छ।’ उनले वर्तमान सामाजिक प्रवृत्तिले मानिसको सोच र व्यवहारमा असर पारिरहेको समेत बताएका छन्।