उदयपुर । आइतबार साँझ आएको हावाहुरीमा उदयपुरको कटारीमा २ जनाको मृत्यु भएको छ भने ५ जना घाइते भएका छन्।

मृत्यु हुनेमा कटारी–८ की मिनामाया तामाङ र कटारी–५ निवासी ६४ वर्षीय वीरेन्द्र चौधरी रहेका छन्।

इलाका प्रहरी कार्यालय कटारीका अनुसार, कटारी–५ स्थित राधा कृष्ण मन्दिर नजिक टिनको छाना र काठको खाजा घरमा सालको रुख ढलेर चौधरीको मृत्यु भएको हो। मिनामाया तामाङ घरमा खसी–बाख्रा सार्दा हावाले भाँचेको रुखको हाँगाले लागेको चोटका कारण राति मृत्यु भएको प्रहरीले जनाएको छ।

घाइतेमध्ये ४ वर्षीया बिनिशा चौधरी, २७ वर्षीय युवराज कार्की, ४६ वर्षीय लीला बहादुर दनुवार, ४६ वर्षीय प्रेमचन्द्र दनुवार र १६ वर्षीया अस्मिता परियार रहेका छन्। उनीहरूको प्रादेशिक अस्पताल कटारीमा उपचार भइरहेको छ।

प्रहरी नायब उपरीक्षक केदारमान दोङले बताए अनुसार, घाइते बालिका बिनिशा चौधरीलाई नेपाल प्रहरी, सशस्त्र प्रहरी र स्थानीयवासीको सहयोगमा करिब ४० मिनेटमा उद्धार गरिएको थियो।

उदयपुर घटनामा घाइते लीलाबहादुर दनुवारको गम्भीर चोटका कारण उनलाई थप उपचारका लागि विराटनगर पठाइएको छ।