काठमाडौं । नेपाली कांग्रेस ले प्रतिनिधिसभातर्फका २० जना समानुपातिक सांसदहरूको नाम टुंगो लगाएको छ।

आज बसेको पार्टी बैठकले १५ महिला र ५ पुरुष गरी २० जनाको नाम अन्तिम रूपमा चयन गरेको पार्टी प्रवक्ता देवराज चालिसेले जानकारी दिए।

कांग्रेसले यस पटकको निर्वाचनमा समानुपातिकतर्फ २० सिट जितेको छ। प्रतिनिधिसभा र राष्ट्रिय सभा गरी कांग्रेसका कुल ६२ सांसद हुनेछन्। तीमध्ये ३३ प्रतिशत अर्थात् कम्तीमा २१ जना महिला प्रतिनिधित्व सुनिश्चित गर्नुपर्ने संवैधानिक व्यवस्था छ। सोही व्यवस्थाअनुसार कांग्रेसले समानुपातिक सूचीमा १५ जना महिला उम्मेदवार चयन गरेको चालिसेले बताए।

उनका अनुसार क्लस्टर मिलाएर सांसद चयन गरिएको छ। जसअनुसार आदिवासी जनजातिबाट ६ जना, खस आर्यबाट ६ जना तथा थारु, दलित, मधेसी, मुस्लिम र पिछडिएको समुदायबाट गरी ५ जना सांसद चयन गरिएको छ।

समानुपातिकतर्फ चयन भएका सांसदहरूको नामावली छिट्टै निर्वाचन आयोग नेपाल मा बुझाइने तयारी कांग्रेसले गरेको छ।