काठमाडौं । नेपाली कांग्रेसका करिब ३० भन्दा बढी केन्द्रीय सदस्यहरूले सभापति गगन थापालाई राजीनामा नदिन सुझाव दिएका छन्। आज बिहान बालुवाटारमा भएको भेटमा नेताहरूले अहिलेको अवस्थामा राजीनामा समाधान नभएको बताएका हुन्।

सभापति थापालाई भेट्न सहमहामन्त्री प्रकाश रसाइली ‘स्नेही’, मधु आचार्य, अजयबाबु शिवाकोटीलगायत नेताहरू पुगेका थिए। भेटमा समसामयिक राजनीतिक अवस्था र चुनावी समीक्षाबारे छलफल भएको केन्द्रीय सदस्य अजयबाबु शिवाकोटीले बताए।

उनका अनुसार अहिले कांग्रेसलाई सम्हालेर अघि बढाउनुपर्ने समय भएकाले राजीनामा दिनु उपयुक्त नहुने धारणा नेताहरूले राखेका थिए।

प्रतिनिधिसभा निर्वाचनमा कांग्रेसको कमजोर नतिजापछि सभापति थापाले राजीनामा दिने संकेत गरेका थिए। तर उपसभापति विश्वप्रकाश शर्माले हतार नगर्न आग्रह गरेपछि निर्णय तत्कालका लागि रोकिएको छ। कांग्रेसले चुनावी समीक्षाका लागि चाँडै केन्द्रीय समिति बैठक बोलाउने तयारी गरेको छ।