काठमाडौं । भ्लादिमिर पुटिन र मसुद पेजेश्कियानबीच टेलिफोन वार्ता भएको छ। वार्ता मुख्यतः मध्यपूर्वमा जारी युद्ध र क्षेत्रीय तनावका विषयमा केन्द्रित रहेको बताइएको छ।

रुसका राष्ट्रपति पुटिनले मंगलबार राति इरानी राष्ट्रपति पेजेश्कियानसँग टेलिफोनमा कुराकानी गरेका हुन्। क्रेमलिनका अनुसार वार्ताका क्रममा पुटिनले जारी युद्ध छिट्टै रोकेर क्षेत्रीय तनाव कम गर्न आवश्यक रहेको बताएका थिए। उनले द्वन्द्वको समाधान कूटनीतिक माध्यमबाट खोजिनुपर्नेमा जोड दिएका थिए।

फोन वार्ताका क्रममा पेजेश्कियानले रुसले गरेको समर्थन र मानवीय सहयोगका लागि धन्यवाद व्यक्त गरेका थिए।

यसअघि डोनाल्ड ट्रम्पले पनि आफूले पुटिनसँग टेलिफोनमा कुराकानी गरेको बताएका थिए। ट्रम्पका अनुसार दुई नेताबीच इरानमा भइरहेको युद्ध र रुस–युक्रेन युद्धको अवस्थाबारे पनि छलफल भएको थियो।

ट्रम्पले पुटिनले इरानको युद्ध अन्त्य गराउन सहयोग गर्ने प्रस्ताव गरेको बताएका छन्। तर उनले पुटिनलाई रुस–युक्रेन युद्ध अन्त्य गराउन मद्दत गर्न सके त्यो अझ उपयोगी हुने प्रतिक्रिया दिएका थिए।

फेब्रुअरीको अन्तिम साता अमेरिका र इजरायलको संयुक्त आक्रमणमा इरानका सर्वोच्च नेता अली खामेनीसहित केही शीर्ष नेताको मृत्यु भएको थियो। त्यसपछि इरानले उनका छोरा मोज्तबा खामेनीलाई नयाँ सर्वोच्च नेता चयन गरेको छ।

पुटिनले सोमबार मोज्तबा खामेनीलाई इरानको नयाँ सर्वोच्च नेता बनेकोमा बधाई दिएका थिए। ट्रम्पले भने नयाँ नेताप्रति असन्तुष्टि जनाउँदै मोज्तबा खामेनीलाई धेरैले नचिनेको टिप्पणी गरेका थिए।