काठमाडौं । नेपाल कम्युनिस्ट पार्टी (नेकपा) का संयोजक पुष्पकमल दाहाल ले आगामी निर्वाचनमा कुनै पनि दलसँग चुनावी तालमेल नगर्ने स्पष्ट पारेका छन्।

पार्टी कार्यालय पेरिसडाँडामा आयोजित पत्रकार सम्मेलनमा बोल्दै उनले यसपटक पार्टी आफ्नै एजेन्डा र जनआधारको बलमा चुनावमा जाने बताए। “हामी आफ्नै पार्टी र जनताको बलमा निर्वाचनमा जान्छौँ, यो कुरा पहिलो दिनदेखि नै भन्दै आइरहेका छौँ,” उनले भने, “तर मिडियामा विभिन्न समीकरण बन्नेबारे चर्चा भइरहेको छ, जसको हामीले निरन्तर खण्डन गर्दै आएका छौँ।”

प्रचण्डले भदौ २३ गतेको घटनामा संलग्न जिम्मेवार दल र भदौ २४ गते विध्वंस मच्चाउने शक्तिसँग कुनै प्रकारको सहकार्य नहुने स्पष्ट गरे। केही निर्वाचन क्षेत्रमा सिट छाड्ने वा समझदारी गर्ने भन्ने चर्चामा कुनै सत्यता नरहेको पनि उनले दाबी गरे।

उनका अनुसार नेकपा आफ्नै शक्ति र कार्यक्रमसहित चुनावमा होमिएको छ। नेपाली कांग्रेस वा नेपाल कम्युनिस्ट पार्टी (एमाले) सँग मिलेर महागठबन्धन गर्ने कुनै सम्भावना नरहेको उनले प्रष्ट पारे।