पनौती । प्रतिनिधिसभा निर्वाचन क्षेत्र नं १ का उम्मेदवार तथा नेकपा एमालेका केन्द्रीय सदस्य अमित लामाले पनौतीको समग्र विकासका लागि सूर्य चिन्हमा मतदान गर्न घरदैलोमै पुगेर मतदातासँग आग्रह गरेका छन्।

एमालेको घरदैलो अभियानअन्तर्गत आज पनौती नगरपालिका वडा नं. ४ बाट सुरु गरिएको हो। घरदैलो अभियानमा संविधानसभा सदस्य रामहरी सुबेदी, एमाले नेता एवं पनौती नगरका पूर्व मेयर भीम न्यौपाने लगायतका नेता तथा कार्यकर्ताहरूको उल्लेखनीय सहभागिता रहेको थियो।

घरदैलोका क्रममा उम्मेदवार लामाले पनौतीको ऐतिहासिक पहिचानलाई जोगाउँदै आधुनिक पूर्वाधार, व्यवस्थित सडक, खानेपानी, शिक्षा र स्वास्थ्य क्षेत्रमा सुधार गर्ने प्रतिबद्धता व्यक्त गरे। उनले पनौतीलाई समृद्ध, व्यवस्थित र अवसरयुक्त नगरका रूपमा विकास गर्ने आफ्नो स्पष्ट योजना रहेको बताए।

स्थानीयवासीसँग प्रत्यक्ष भेटघाट गर्दै उनले भने, “अब पनौतीले परिवर्तन खोजेको छ। विकास, सुशासन र स्थायित्वका लागि सूर्यमा मतदान गर्नुहोस्।”

एमालेका नेता तथा कार्यकर्ताहरूले घरदैलोमार्फत मतदातासँग संवादलाई तीव्र बनाउँदै चुनावी अभियानलाई अझ प्रभावकारी बनाउने बताएका छन्।