धनगढी। एमाले र राष्ट्रिय स्वतन्त्र पार्टी (रास्वपा) का कार्यकर्ताबीच बैतडीमा झडप हुँदा एमालेका दुई जना कार्यकर्ता घाइते भएका छन्।

चुनावी प्रचारप्रसारका लागि घरदैलो कार्यक्रममा डिलासैनि गाउँपालिकास्थित लेक टोलमा दुई पक्षबीच विवाद बढ्दै झडप भएको प्रहरीले जनाएको छ।

जिल्ला प्रहरी कार्यालय बैतडी का प्रवक्ता प्रहरी निरीक्षक सुरज सिंहका अनुसार झडपमा परी डिलासैनी–७ निवासी एमाले निकट युवा संघका जिल्ला सदस्य जनक धामी र सोही स्थानका माधव धामी घाइते भएका छन्।

प्रहरीका अनुसार जनक धामीको टाउको र निधारमा चोट लागेको छ भने माधव धामीको ढाड र दाहिने खुट्टामा चोट लागेको छ। दुवै जनाको उपचार गोकुलेश्वर अस्पताल मा भइरहेको छ।

घटनापछि प्रहरीले रास्वपाका पाँच जना कार्यकर्तालाई नियन्त्रणमा लिएको जनाएको छ। घटनाबारे थप अनुसन्धान भइरहेको प्रहरीले जनाएको छ।