भक्तपुर, ११ फागुन : १७ औँ प्रधान सेनापति अन्तरविद्यालय रनिङ्ग टि २० क्रिकेट प्रतियोगिताको उपाधि डिएभी स्कुलल् हात पारेको छ । 

सैनिक आवासीय महाविद्यालय सल्लाघारी भक्तपुरको आयोजनामा आज सम्पन्न फाइनल खेलमा डिएभी स्कुल जाउलाखेलले नेपाल प्रहरी स्कुल साँगालाई ३० रनले पराजित गर्दै उपाधि जितेको हो । 

महाविद्यालयको घरेलु मैदानमा माघ २६ गतेबाट सुरु भई आज समापन भएको प्रतियोगिताको आज फाइनल खेलमा पहिले ब्याटिङ गरेको डिएभीले ९ विकेटको क्षतिमा १०६ रन बनाएको थियो । १०७ रनको लक्ष्य पछ्याएको नेपाल पुलिस स्कुलले १३ ओभरमा सबै विकेट गुमाएर ७६ रन मात्र जोड्न सफल भएको थियो ।  उपाधी चुमेको डिएभीलाई नेपाली सेनाका प्रधान सेनापति बलाधिकृत रथी प्रदिप जंग केसीले रु. एक लाख पुरस्कार सहित ट्रफि प्रदान गर्नुभयो भने दोश्रो हुने नेपाल पुलिस स्कुलले रु. ५० हजार पुरस्कार र ट्रफि प्रदान गर्नभयो । 

समापन समारोहलाई बोल्दै सेनापति केसीले यस्ता प्रतियोगिताले राष्ट्रिय तथा अन्तर्राष्ट्रिय खेलाडी जन्माउन टेवा पुगेको भन्दै नेपालको क्रिकेट खेलमा पछिल्लो समय फड्को मारेर अन्तर्राष्ट्रिय स्तरमा समेत नाम राख्न सफल भएको बताउनुभयोे । कार्यक्रममा उप विजेता लगायतलाई उपरथि सन्तोष बल्लभ पौडेल, सहायकरथी प्रकाश बहादुर चन्दले टिम क्याप्टेन, खेलाडीलगातलाई ट्रफि, पुरस्कार तथा प्रमाणपत्र प्रदान गर्नु भएको थियो ।

प्रतियोगितामा डिएभी स्कुलका कमल शाही फाइनल खेलका ‘प्लेयर अफ द म्याच’, डिएभी स्कुलकै तनिश शाह ‘सर्वोत्कृष्ट बलर’, सैनिक आवासीय महाविद्यालयका राजदीप आचार्य ‘सर्वोत्कृष्ट ब्याट्सम्यान’, नेपाल पुलिस स्कुलका सागर सिंह ‘सर्वोत्कृष्ट फिल्डर’ तथा नेपाल पुलिस स्कुलकै प्रियान्सु किशोर रावत ‘प्लेयर अफ द सिरिज’ घोषित भए भने डिएभी स्कुलका श्री शंकर पौडेललाई ‘उत्कृष्ट प्रशिक्षक’को उपाधि प्रदान गरियो ।

भलिबलमा छात्रतर्फ हिमरश्मि हाईस्कुल र छात्रातर्फ सैनिक आवासीय महाविद्यालयले चुम्यो उपाधी

त्यसैगरि सैनिक आवासीय महाविद्यालय अन्तरविद्यालय भलिबल प्रतियोगिता–२०८२ को छात्रतर्फ हिमरश्मि हाईस्कुल विजेता बनेको छ भने सैनिक आवासीय महाविद्यालयले उपविजेतामै चित्त बुझाएको छ । कार्यक्रममा विजेतालाई रु. ३० हजार र रु. २० हजार नगद पुरस्कारसहित ट्रफी र प्रमाणपत्र प्रदान गरिएको छ ।

भलिबल प्रतियोगितामै छात्रा तर्फ सैनिक आवासीय महाविद्यालय विजेता भएको छभने र सेन्ट लरेन्स कलेजले उपविजेता भएको छ । कार्यक्रममा विजेतालाई रु. ३० हजार र रु. २० हजार नगद पुरस्कारसहित ट्रफी र प्रमाणपत्र प्रदान गरिएको छ ।

कार्यक्रममा महाविद्यालयका प्राचार्य दलप्रसाद पुन, महाविद्यालयका प्रमुख व्यवस्थापक महासेनानी शिव प्रसाद पौडेलले महाविधालयले शैक्षिक गतिविधिसंगै खेलकुद लगायतका अतिरिक्त क्रियाकलापमा महत्वपूर्ण उपलब्धीहरु हासिल गरेको चर्चा गर्नु भएको थियो ।  कूल ११ विद्यालयका १२ टिमको सहभागिता रहेको प्रतियोगिता सफलतापूर्वक सम्पन्न गर्न सहयोग गर्ने अफिसियलहरूलाई प्रमाणपत्र र मायाको चिनो प्रदान गरिएको महासेनानी पौडेलले जानकारी दिनुभयो ।