काठमाडौं । नेपाली कांग्रेसका सभापति गगन थापाले मधेश प्रदेशको वित्तीय संरचना खलबलिएको बताएका छन्। जनकपुरमा आयोजित पार्टी सभालाई सम्बोधन गर्दै उनले मिटरब्याज, लघुवित्त र सहकारी क्षेत्रमा देखिएको समस्या समाधान गर्ने प्रतिबद्धता व्यक्त गरे।

थापाले सहकारीका नाममा भइरहेको ठगीप्रति कडा टिप्पणी गर्दै दोषीलाई कानुनी दायरामा ल्याइने बताए। “सहकारीका ठगहरूलाई तह लगाउने मात्रै होइन, मिटरब्याज र लघुवित्तका ठगहरूलाई पनि नियन्त्रण गर्छौं,” उनले भने, “मधेशमा दिगो र विश्वसनीय वैकल्पिक वित्तीय संरचना निर्माण गर्न चाहन्छौं।”

उनले आफू मधेशका दलित, अल्पसङ्ख्यक र महिलाका लागि नयाँ सोच र योजनासहित अघि बढेको बताए। साथै, मधेशमा लागूऔषध दुर्व्यसनको समस्या गम्भीर रहेको उल्लेख गर्दै त्यसको नियन्त्रणका लागि विशेष पहल गरिने जानकारी दिए ।

त्यस्तै, उनले मधेशमा क्रिकेट रंगशालालगायत अन्य पूर्वाधार विकासका काम पाँच वर्षभित्र सम्पन्न गर्ने लक्ष्य रहेको बताए ।