काठमाडौं । गगन थापा ले राजनीतिक दलहरू प्रश्नबाट भाग्ने प्रवृत्तिको अन्त्य हुनुपर्ने बताएका छन्। जनकपुरमा प्रतिज्ञापत्र सार्वजनिक कार्यक्रमलाई सम्बोधन गर्दै उनले स्पष्ट शब्दमा भने, “नेपाली कांग्रेस प्रतिज्ञा लिएर आएको छ, तपाईं प्रश्न लिएर आउनुस्। प्रश्नबाट भाग्ने होइन, सामना गर्न सक्नुपर्छ।”

उनको यो अभिव्यक्ति प्रत्यक्ष रूपमा दलहरूमाथि लाग्दै आएको गैरजवाफदेही राजनीतिप्रति संकेत मानिएको छ। विगतमा चुनावी प्रतिबद्धता सार्वजनिक गरिए पनि कार्यान्वयनमा कमजोरी देखिएको सन्दर्भमा थापाको चुनौतीलाई अब व्यवहारमा पुष्टि गर्नुपर्ने दबाब पनि बढेको छ।

उनले जनताको प्रश्नको प्रत्यक्ष उत्तर दिन भोलि राष्ट्रिय सभा गृहमा उपस्थित हुने घोषणा गरेका छन्। साथै, काठमाडौं बाहिर रहेका नागरिकलाई अनलाइन माध्यमबाट प्रश्न पठाउन आग्रह गरेका छन्।

तर प्रश्न उठ्छ-के यो केवल भाषणको दृढता हो, वा व्यवहारमा देखिने पारदर्शिता? जनताको विश्वास जित्न अब शब्दभन्दा कर्म बलियो हुनुपर्ने स्पष्ट छ। भोलिको कार्यक्रमले गगन थापाको दाबीलाई प्रमाणित गर्नेछ कि केवल राजनीतिक सन्देशमै सीमित रहनेछ, त्यो हेर्न बाँकी छ।