भक्तपुर । प्रतिनिधि सभा निर्वाचनका लागि मतपत्र छपाइ अन्तिम चरणमा पुगेको छ। जनक शिक्षा सामग्री केन्द्र लिमिटेडले आज दिनभरमा बाँकी मतपत्र छापिसक्ने जानकारी दिएको छ।

केन्द्रका प्रबन्ध सञ्चालक यदुनाथ पौडेलका अनुसार, प्रत्यक्षतर्फका दुई करोड तीन लाख मतपत्रमध्ये बाँकी रहेको पाँच लाख मतपत्र आजै छापिनेछ। उनले भने, “४२ दिनको कार्यतालिका लिएर मतपत्र छपाइ सुरु गरेका थियौं, तर आज ४० दिनमै सबै कार्य सम्पन्न हुनेछ।”

पौडेलका अनुसार आज छपाइ सकिएपछि मतपत्र प्याकिङ गरी बाँकी जिल्लामा ढुवानी गरिनेछ। यसअघि दैनिक १३ देखि १५ लाख मतपत्र छापेर लक्ष्यभन्दा अघि नै काम सम्पन्न गरिएको थियो।

त्यस्तै, केन्द्रले छपाइ सम्पन्न गरेको १० लाख नमूना मतपत्र निर्वाचन आयोगले विभिन्न ठाउँमा पुर्याइसकेको छ। समानुपातिकतर्फका २ करोड ८ लाख ३० हजार मतपत्र छापि प्याकिङ गरी जिल्ला–जिल्ला पठाउने कार्य भइरहेको छ।

पौडेलले बताए अनुसार, कर्णाली र सुदूरपश्चिममा सबै मतपत्र पुगिसकेको छ भने बाँकी क्षेत्रमा फागुन १२ गतेसम्म पुर्याउने लक्ष्य राखिएको छ।