दमक । नेकपा एमालेका अध्यक्ष केपी शर्मा ओली आज आफ्नै निर्वाचन क्षेत्र झापा जिल्ला मा सक्रिय रहनुभएको छ। उहाँ बिहान १०:२० बजे काठमाडौंबाट भद्रपुर विमानस्थल अवतरण गरी शिक्षक, धिमाल समुदाय र मुस्लिम समुदायसँग हुने भेलामा सहभागी हुने जनाएको छ ।

त्यसपछि दमक-२ स्थित अस्थायी निवासमा कार्यकर्ता र स्थानीयसँग प्रत्यक्ष भेटघाट गर्ने कार्यक्रम तय गरिएको छ। फागुन ६ गतेसम्म उहाँ झापामै रहेर दैनिक ६-७ स्थानमा घरदैलो कार्यक्रम सञ्चालन गर्नुहुनेछ।

सोमबारको कार्यक्रमअनुसार दमक-५ यलम्बर चोक, दमक–६ शंखधर चोक, दमक–७ तबिन चोक, दमक–१ हल्दार चोक, दमक–३ गजकाली मन्दिर र आमचोकमा कार्यक्रम राखिएको छ। एमाले दमकका अध्यक्ष राम पौडेलका अनुसार यी सबै स्थानमा प्रत्यक्ष संवादको वातावरण तयार गरिएको छ।

कार्यक्रमले स्थानीय कार्यकर्ता र जनसमुदायमा उत्साह थपेको छ, जसले आगामी निर्वाचनमा एमालेको आधार मजबुत हुने अपेक्षा गरिएको छ।