विराटनगर । मोरङ क्षेत्र नम्बर ६ बाट प्रतिनिधिसभा सदस्य पदका उम्मेदवार नेकपा एमालेका विनोद ढकाल ले आफ्नो बुबाको निधनपछि पनि मतदातासँगै रहेको बताएका छन्।

ढकालले आज भिडियो सन्देश जारी गर्दै भने, “म मतदाता बीचमै छु, र मन मतदातासँगै छ। अहिलेको परिस्थितिपछि म तपाईँहरू बीचमा आएर सुझावहरु लिने नै छु।” मतदातासँग व्यक्तिगत रूपमा भेट नभएपनि नेकपा एमालेका कार्यकर्ताहरू घरदैलोमा पुग्ने उनले जनाएका छन्।

उहाँले आफूले क्षेत्रका समस्याहरू बुझिसकेको र ती समाधान गर्न सक्रिय रहने प्रतिवद्धता पनि व्यक्त गर्नुभयो। मोरङ क्षेत्र नम्बर ६ बाट नेपाली कांग्रेसका शेखर कोइराला पनि उम्मेदवार हुनुहुन्छ।

एमाले भित्र आवाज बुलन्द गर्ने नेता र स्थानीय जनताबीच लोकप्रिय नेता भनेर चिनिएका ढकाल यस निर्वाचनमा कांग्रेसका उम्मेदवारलाई पराजित गर्ने लक्ष्यका साथ प्रचारप्रसारमा सक्रिय छन्।