सिन्धुली: निर्वाचनमा पराजय हुने अबस्था आएपछि नेकपाका उमेदवारले कस्तो षडयन्त्र गर्न लगाउँछन् भन्ने कुरा हिजो हरिहरपुरगढीमा भएको घटनाले सार्वजनिक गरेको छ । सिन्धुली क्षेत्र नम्बर २ का नेकपा उमेदवार राजन दाहालको निर्देशनमा एमालेका स्थानीय कार्यकर्तालाई झुठा आश्वास दिएर पार्टी प्रवेशको डंका पिटेको कुरा साँझसम्म पनि टिक्न सकेन । उनीहरु स्वयमंले कुरा गर्नु छ भन्दै बोलाएर भ्रममा पारी पार्टी प्रवेश गराइरहेको आरोप बढ्दै गएको छ ।

विचार, नीति र संगठनात्मक स्पष्टता भन्दा पनि अस्थायी लाभ, पद–प्रतिष्ठाको आश्वासन र अपुष्ट राजनीतिक दाबी देखाएर कार्यकर्ता तान्ने प्रयास भइरहेको हरिहरपुरगढीका स्थानीय दिपक माझीले बताए । मंगलबार हरिहरपुरगढी गाउँपालिका अध्यक्ष बज्रध्वज वाईवाले वडा नं.–५ का नेकपा(एमाले)का मतदाताहरूलाई सत्ताको स्वार्थ देखाउदै भ्रमित पारेर प्रवेश गराएको नौटकी देखाएको माझीले बताए । उनले भने,“पराजित मानसिकता बोकेकाहरूको नौटंकी मात्र हो, स्थानीय सरकार प्रमुखले सत्ताको दुरूपयोग गर्दै आचारसंहिता बिपरित काम गरेका छन ।”

नेकपाको राजन समुहले स्थानीय सत्ताको दुरूपयोग गर्दै विभिन्न लोभलालच र आश्वासन बाड्दै अन्य दल तथा स्वतन्त्र धारका कार्यकर्तालाई प्रवेश गराउने गरेको छ । आफ्नै पार्टी भित्र बिभाजनको सिकार बनेका दाहालले गोयबल्स शैलीमा प्रवेशको लहर देखाउनु लज्जास्पद रहेको स्थानीयहरू बताउछन् । उनका पार्टीका केन्द्र र जिल्लाका नेता उनका बिरूद्व स्वतन्त्र उम्मेदवारको पक्षमा रहेको अवस्थामा उनको नौटंकीले मनको लड्डु घ्यूसँग खानु भन्ने उखानलाई चरितार्थ गरिरहेको छ ।

सिन्धुलीकै एक स्थानीय नेता भन्छन्, “यहाँ संगठन विस्तारभन्दा संख्या देखाउने राजनीति भइरहेको छ । विचार नमिल्ने, नीति नबुझाइने, तर मञ्चमा उभ्याएर फोटो खिचिने ।”

विश्वास र वैचारिक स्पष्टता बिना गरिएको प्रवेश टिकाउ नहुने उनीहरूको निष्कर्ष छ । अझ गम्भीर पक्ष के छ भने, प्रवेश गराइएका धेरै कार्यकर्तालाई पार्टीको आन्तरिक संरचना, कार्यदिशा र स्थानीय एजेन्डाबारे स्पष्ट जानकारी नदिइएको पाइएको छ । यसले उनीहरू आफू प्रयोग मात्रै भएको अनुभूति गर्न थालेका छन् ।

सिन्धुलीमा केही समयअघि प्रवेश गराइएका कार्यकर्तामध्ये कतिपय पुनः निष्क्रिय बन्दै गएको देखिन थालेको छ । यसले नेकपाको ‘जिल्लामा जनआधार विस्तार’ भन्ने दाबीमाथि नै प्रश्न खडा गरेको छ ।

राजनीतिमा प्रवेश भ्रम र चलखेलबाट होइन, विश्वास र स्पष्टताबाट हुनुपर्छ। नत्र, संख्या बढे पनि संगठन भित्र असन्तोष र विचलन बढ्ने खतरा स्पष्ट देखिन थालेको छ ।