काठमाडौं । राष्ट्रपति रामचन्द्र पौडेलले सुशासन र पारदर्शिता बिना लोकतन्त्रको प्रतिफल जनताका घरदैलोमा नपुग्ने बताएका छन्।

अख्तियार दुरुपयोग अनुसन्धान आयोगको ३५औँ स्थापना दिवसका अवसरमा बुधबार आयोजित कार्यक्रममा बोल्दै उनले भ्रष्टाचार नियन्त्रण लोकतन्त्र सुदृढीकरणको अनिवार्य शर्त भएको उल्लेख गरे।

“सुशासन र पारदर्शिता बिना लोकतन्त्रको प्रतिफल जनतामा पुग्दैन,” राष्ट्रपति पौडेलले भने, “जनताको अपेक्षा अनुसारको विकास र समृद्धिका लागि अख्तियार दुरुपयोगको अन्त्य र भ्रष्टाचार नियन्त्रण आवश्यक छ।”

उनले भ्रष्टाचारलाई केवल कानुन उल्लंघन नभई नागरिकको विश्वासमाथिको गहिरो आघातको रूपमा व्याख्या गर्दै सबै प्रकारका भ्रष्टाचारलाई छानबिनको दायरामा ल्याउन जोड दिए। साथै, भ्रष्टाचार नियन्त्रणमा दृढ राजनीतिक प्रतिबद्धता पहिलो सर्त रहेको पनि उनले बताए।