सर्लाही । सर्लाही सदरमुकाम मलंगवामा रहेको प्रादेशिक अस्पतालको गोदाममा ठूलो परिमाणमा औषधि म्याद सकिएको पाइएको छ। समयमै वितरण नहुँदा म्याद गुज्रिएको औषधि अस्पताल परिसरमै जलाएर नष्ट गरिएको छ।

अस्पतालमा उपचारका लागि आउने बिरामी आवश्यक औषधि नपाएर निजी मेडिकल पसलबाट किन्न बाध्य छन्। अस्पतालका मेडिकल सुपरिटेन्डेन्ट डा. रामप्रकाश साहले म्याद सकिएका औषधि आफ्नो कार्यकालअघिकै भएको दाबी गर्दै औषधि जलाउने निर्देशन आफूले नदिएको बताएका छन्।

स्थानीयले औषधि खरिद, भण्डारण र वितरण प्रक्रियामा पारदर्शिता र अनुगमनको अभाव भएको भन्दै छानबिनको माग गरेका छन्।

स्वास्थ्य मापदण्डविपरीत औषधि जलाएर नष्ट गरिएको भन्दै स्थानीयवासीले आपत्ति जनाएका छन्। उनीहरूले औषधि खरिद, भण्डारण र वितरण प्रक्रियामा पारदर्शिता र नियमित अनुगमनको गम्भीर अभाव रहेको भन्दै सम्बन्धित निकायको ध्यानाकर्षण गराएका छन्।