काठमाडौं। राष्ट्रिय युवा सङ्घ नेपालको केन्द्रीय युवा परिषद्को प्रथम बैठकले उपाध्यक्ष महाराज गुरुङलाई सङ्घको अध्यक्ष चयन गरेको छ। यो निर्णयलाई नेकपा (एमाले) ले आगामी प्रतिनिधिसभा सदस्य निर्वाचनलाई केन्द्रमा राख्दै युवा संगठनलाई थप सक्रिय र परिचालित बनाउने रणनीतिक कदमका रूपमा हेरिएको छ।

नेपाल कम्युनिष्ट पार्टी (एमाले) का महासचिव शंकर पोखरेल, सचिव महेश बस्नेत, सचिव भानुभक्त ढकाललगायत शीर्ष नेताहरूको उपस्थितिमा सम्पन्न बैठकमा निवर्तमान अध्यक्ष क्षितिज थेबेले उपाध्यक्ष गुरुङलाई औपचारिक रूपमा नेतृत्व हस्तान्तरण गरेका हुन्।

राष्ट्रिय युवा सङ्घको गत जेठ १४ गते पोखरामा सम्पन्न दशौँ राष्ट्रिय महाधिवेशनबाट निर्वाचित अध्यक्ष थेबे आसन्न प्रतिनिधिसभा सदस्य निर्वाचनमा ताप्लेजुङबाट नेकपा (एमाले) का उम्मेदवार रहेकाले संगठनको नेतृत्व परिवर्तन गरिएको हो।

अध्यक्षको जिम्मेवारी सम्हालेपछि महाराज गुरुङले पद तथा गोपनीयताको सपथ लिँदै संगठनलाई निर्वाचन केन्द्रित अभियानमा परिचालन गर्ने प्रतिबद्धता व्यक्त गरेका छन्। उनले युवा सङ्घलाई केवल भातृ संगठनको सीमामा सीमित नराखी राजनीतिक प्रशिक्षण, जनसम्पर्क र संगठन विस्तारको अग्रपंक्तिमा उभ्याउने संकेत दिएका छन्।

एमाले नेतृत्वले पछिल्लो समय युवामाझ बढ्दो राजनीतिक असन्तोष, वैकल्पिक कथन र सामाजिक सञ्जालमार्फत फैलँदै गएको भ्रमको प्रतिवाद गर्न युवा संगठनको भूमिकालाई निर्णायक मानेको देखिन्छ। यही सन्दर्भमा अनुभवी, संगठनात्मक रूपमा सक्रिय र पार्टी पंक्तिमा स्वीकार्य नेतृत्वका रूपमा गुरुङलाई अगाडि सारिएको बुझाइ पार्टी वृत्तमा छ।

राजनीतिक विश्लेषकहरूका अनुसार क्षितिज थेबेको निर्वाचन मैदान प्रवेश र त्यससँगै संगठनको नेतृत्व हस्तान्तरणले एमालेभित्र “संगठन र निर्वाचनबीच स्पष्ट भूमिका विभाजन” को सन्देश दिएको छ। यसले पार्टी संगठनलाई निरन्तर चलायमान राख्दै उम्मेदवारलाई चुनावी मैदानमा केन्द्रित हुन सहज बनाउने अपेक्षा गरिएको छ।

युवा सङ्घ नेपालको नयाँ नेतृत्वले अब युवा मतदाता, रोजगारी, राष्ट्रिय स्वाधीनता, लोकतन्त्र र स्थायित्वका मुद्दालाई जोडेर अभियान सञ्चालन गर्ने तयारी गरेको जनाइएको छ। यसलाई एमालेको समग्र निर्वाचन रणनीतिको एक महत्त्वपूर्ण अंगका रूपमा हेरिएको छ।