सिन्धुली। नेकपा एमालेले निर्वाचन केन्द्रित अभियानलाई तिब्रता दिएको छ । कमलामाई नगपालिकाका निवर्तमान नगर प्रमुख खड्ग बहादुर खत्रीको आयोजनामा आज सिन्धुलीमा भएको जनप्रतिनिधिहरूको भेलाले पार्टीका उम्मेदवार मनोज जंग थापा लाई विजयी गराउन आ आफ्नो तर्फबाट सबै कामहरू अगाडि बढाउने निष्कर्ष निकालेका छन् ।

सिन्धुली क्षेत्र नं. २ का उम्मेदवारहरू मध्ये एमालेका उम्मेदवार थापा सबै भन्दा सक्षम, निस्कलंक र जनप्रिय भएकाले पनि विजय निश्चित भएको सहभागी जनप्रतिनिधिहरूले निष्कर्ष निकालेका छन् । नेकपा एमालेका तर्फबाट निर्वाचित जनप्रतिनिधिहरूले आफ्नो कार्यकालमा भएका जनपक्षीय कामहरू बाहिर ल्याउन आवश्यक रहेको कमलामाईकी उपप्रमुख मञ्जु देवकोटाले बताईन् । उनले सबै जनप्रतिनिधिले आफ्नो तर्फबाट पार्टीका उम्मेदवारलाई जिताउने भूमिका निर्वाह गर्न सुझाईन्।

एमालेकी केन्द्रिय सदस्य एबम् २ नं क्षेत्र परिचालन कमिटीका संयोजक निरू दर्लामीले यो निर्वाचनमा पार्टी विजय निकट रहेकाले यस पटक पराजय हुने छुट नभएको प्रस्ट परिन् । उनले भनिन् – निर्वाचनमा उच्च मनोबलका साथ कमलामाईमा हाम्रा जनप्रतिनिधिले गरेका राम्रा कामको प्रचार गर्नुस् । निवर्तमान नगर प्रमुख खड्ग खत्रीले आफ्नो अगुवाइमा भएका राम्रा कामहरू सम्पूर्ण जनप्रतिनिधि र पार्टीका नेताहरूले निर्धक्क राख्न सुझाव दिए । एमाले जिल्ला अध्यक्ष महेन्द्र देव श्रेष्ठले सिन्धुलीका २ वटै निर्वाचन एमालेले जित्ने उद्घोष गरे । कार्यक्रममा सहभागी जनप्रतिनिधीहरुले पार्टी नेता र उमेदवारको सामु विजयको झण्डा फहराउने उद्घोष गरेका थिए ।

कार्यक्रममा यसै क्षेत्रका उम्मेदवार मनोज जंग थापाले आफ्नो तर्फबाट आउने प्रतिबद्धता र जनप्रतिनिधिले निर्वाह गर्नु पर्ने कामहरू सुझाएका थिए । अझै एमाले क्षेत्र नं २ को बैठकले २१५९ सदस्यीय निर्वाचन परिचालन कमिटी गठन गरेको छ ।