डडेल्धुरा, सुदूरपश्चिम, सुनसान पहाड र नदीले घेरिएको यो ऐतिहासिक जिल्ला अहिले राजनीतिक उथलपुथलको केन्द्र बनेको छ। वर्षौँसम्म कांग्रेसले यहाँ आफ्नो एकाधिकार जमाएर सुरक्षित सीटको खेल खेल्दै आएको थियो। तर यसपटक केही फरक छ,नेकपा एमालेले आफ्नै माटोबाट उठेका, संघर्षमा खारिएका र जनमुखी नेता चक्रप्रसाद स्नेहीलाई प्रतिनिधि सभा निर्वाचनको मैदानमा उतारेर स्पष्ट सन्देश दिएको छ,डडेल्धुरा अब केवल एक पार्टी वा परिवारको सम्पत्ति होइन, जनताको क्षेत्र हो।श्रमजीवी जनताको सपनाको केन्द्र हो ।

स्नेहीको यात्रा लामो र संघर्षपूर्ण छ। २०४६ सालमा अनेरास्ववियु सदस्यको रूपमा राजनीतिमा प्रवेश गर्दा सुदूरपश्चिमका गाउँहरू शान्त थिएनन्। तर जेन जी युवा चक्रप्रसादले परिवर्तन र उत्तरदायित्वको भावनालाई आफ्नो राजनीतिक जीवनको आधार बनाए। २०४९ सालमा अनेरास्ववियु सत्यवादी विद्यालय, भोपपुर बझाङका सचिव हुँदा उनले नेतृत्व मात्र होइन, जनताको वास्तविक समस्यासँग जोडिन सक्ने क्षमता देखाए।

२०५० सालमा गाउँ कमिटी सचिव शीर्ष, डडेल्धुरा हुँदै २०५३ सालमा इलाका अधिवेशन संयोजक इलाका नम्बर ६, जोगबुडा बनेपछि स्नेहीले स्थानीय तहका समस्याहरू चिन्न र समाधान गर्न थाले शिक्षा, स्वास्थ्य, कृषि, सडक, र सामुदायिक विकास। निरन्तर संवाद, गाउँदेखि जिल्ला स्तरसम्मको सक्रियता र जनताको आवाज उठाउने साहसले उनलाई जनमुखी नेताको परिचय दिएको दिएको छ ।

२०५२ देखि २०६८ सम्म जिल्ला कमिटी सदस्यका रूपमा उनले संगठनमा अनुशासन र नेतृत्व क्षमता प्रदर्शन गरे। २०६४ देखि २०८० सम्म अखिल नेपाल किसान महासंघको केन्द्रीय सचिवालय सदस्य भएर किसान र मजदुरको हितमा काम गरे। मुक्ति समाज नेपालका अञ्चल कमिटी सचिव हुँदै केन्द्रीय सचिवालय सदस्य बनेर उनले संगठन र जनताको सेवा एउटै लक्ष्य भएको प्रमाणित गरे।

२०७४ सालमा राष्ट्रिय सभा सदस्य बन्ने अवसर स्नेहीलाई प्राप्त भयो। संसदमा उनले सुदूरपश्चिमका उत्पीडित जाति, आदिवासी, दलित, किसान, महिला र युवाका मुद्दा उठाए। शिक्षा, स्वास्थ्य, रोजगारी, खुला सिमाना, वैदेशिक हस्तक्षेप जस्ता संवेदनशील विषयमा उनले निर्भीक आवाज उठाए—जब कांग्रेस मौन रहन्थ्यो। कोरोना महामारीको समयमा समयमै नागरिकको उपचार र राष्ट्रियता संरक्षणमा उनले अगुवाइ गर्दै जनताको जीवन र सुरक्षामा प्राथमिकता राखे।

स्नेहीको अर्को विशेषता उनको संगठनप्रतिको निष्ठा हो। नवौँ जिल्ला अधिवेशनमा पार्टी अध्यक्ष बन्न सक्ने हैसियत हुँदाहुँदै उनले पार्टी अध्यक्ष केपी शर्मा ओली र जिल्लाका नेता कार्यकर्ताको सल्लाहअनुसार पदको लागि होइन, संगठन र विचारको लागि पछि हट्ने निर्णय गरे। यही अनुशासन, सामूहिक निर्णय र संगठनप्रतिको प्रतिबद्धता उनलाई डडेल्धुरामा एमालेको प्रतिनिधि सभा उम्मेदवार बनाएको हो।

डडेल्धुरामा विगतमा ‘टुरिष्ट उम्मेदवार’ पठाउने अभ्यास कांग्रेसले गरिरहेको थियो। तर स्नेहीको उम्मेदवारीले स्पष्ट संदेश दिएको छ, अब डडेल्धुरा केवल बाहिरका नेताको खेल क्षेत्र होइन, आफ्नै संगठन र जनताको अधिकार क्षेत्र हो। आफ्नो माटोबाट उठेका, संघर्षमा खारिएका र जनताको वास्तविक आवश्यकतासँग जोडिएका नेताले यहाँ नेतृत्व गर्नुपर्ने आवश्यकता अब स्पष्ट छ।

स्नेहीको राजनीतिक दृष्टिकोण सधैं जनमुखी र व्यावहारिक रह्यो। पार्टी संरचना, जनसंगठन र स्थानीय तहको अनुभवले उनलाई सुदूरपश्चिमका सबै वर्ग र समुदायको वास्तविक आवश्यकता बुझ्ने नेता बनाएको छ। किसान, शिक्षक, स्वास्थ्यकर्मी, विद्यार्थी, महिला र युवा-स्नेही सबैसँग नियमित सम्पर्कमा रहँदा उनी केवल सिद्धान्तवादी नेता मात्र होइन, संगठन र जनतासँग प्रत्यक्ष जोडिएको भुई नेता बने।

यस चुनावमा डडेल्धुरामा दुई विकल्पको टक्कर छैन, संगठन बनाम परिवारवाद, विचार बनाम गुट, संघर्ष बनाम विरासत। चक्रप्रसाद स्नेही त्यही संघर्षको प्रतिनिधित्व हुन् जसले संगठन र जनताको पक्षमा लड्ने विश्वास जनतामा जगाएको छ। उनको नेतृत्वमा एमालेले अब कांग्रेसको दशकौं लामो एकाधिकार तोड्ने लक्ष्यसहित मैदानमा उत्रेको छ।

स्नेहीको कथा केवल व्यक्तिगत सफलता होइन। यो सुदूरपश्चिमका युवाहरू, आदिवासी, दलित, किसान र आम जनताको आवाजको कथा हो। यो कथा हामीलाई याद दिलाउँछ कि राजनीतिमा निष्ठा, संघर्ष र जनमुखी दृष्टिकोणले मात्र बलियो नेतृत्व जन्माउँछ।

आज डडेल्धुरामा एमालेको चुनौती केवल चुनाव जित्ने मात्रै होइन। यो जनमुखी नेतृत्वको विजय, संगठनको दृढता र लोकतन्त्रको बलियो संदेश हो। चक्रप्रसाद स्नेहीको नेतृत्वमा एमालेले सुदूरपश्चिममा नयाँ राजनीतिक संस्कृति, नयाँ आशा र नयाँ नेतृत्वको ढोका खोल्ने तयारी गरिसकेको छ।

डडेल्धुरामा अब विजयीको रफ्तार सुरु भएको छ, स्नेहीको नेतृत्वमा, जनताको विश्वास र संगठनको बलको साथ, एमाले नयाँ इतिहास लेख्न उत्रिएको छ।

• लोकेन्द्र ओझा