काठमाडौं । नेपाल कम्युनिष्ट पार्टी (एमाले) ले काठमाडौँबाट आगामी प्रतिनिधिसभा निर्वाचनका लागि आफ्नो चुनावी अभियान सुरु गर्दैछ।

एमाले बागमती प्रदेश कमिटीले माघ ४ गते काठमाडौँमा जनप्रदर्शनसहित विशेष चुनावी कार्यक्रम थालनी गर्ने तयारी गरेको छ भन्ने जानकारी पार्टीका सचिव एवं प्रदेश इन्चार्ज महेश बस्नेतले दिए।

यस्तै, संशोधित विधानअनुसार गठित राजधानी विशेष कमिटीको घोषणा र अभियानको तयारी माघ २ गते काठमाडौँमा हुने एमाले सचिव एवं राजधानी विशेष कमिटी इन्चार्ज डा. राजन भट्टराईले बताए।

पार्टीको पुस २६ गतेको केन्द्रीय कमिटी बैठकले आगामी फागुन २१ गते तोकिएको प्रतिनिधिसभा सदस्य निर्वाचनका लागि देशव्यापी रूपमा अभियान सुरु गर्ने निर्णय पनि गरेको थियो।