काठमाडौं। नेपाली कांग्रेसको केन्द्रीय कार्यसमितिको बैठक मंगलबार दिउँसो १ बजेका लागि सारिएको छ। यसअघि बिहान ११ बजेका लागि डाकिएको बैठक समय परिवर्तन गरी दिउँसो सारिएको कांग्रेसका मुख्य सचिव कृष्ण पौडेलले जानकारी दिए।

बैठक पार्टी केन्द्रीय कार्यालय सानेपामा बस्नेछ। बैठकमा केन्द्रीय कार्यसमितिका पदाधिकारी, सदस्य, आमन्त्रित सदस्य तथा सातै प्रदेशका सभापतिहरूलाई सहभागी हुन आह्वान गरिएको छ।

यता महामन्त्रीद्वय गगन थापा र विश्वप्रकाश शर्माको नेतृत्वमा आइतबारदेखि काठमाडौंको भृकुटीमण्डपमा विशेष महाधिवेशन जारी छ। विशेष महाधिवेशनकै कारण कांग्रेसभित्रको आन्तरिक विवाद उत्कर्षमा पुगेको छ।

विशेष महाधिवेशन पक्षका केन्द्रीय सदस्यहरूले केन्द्रीय कार्यसमिति बैठकमा सहभागी नहुने घोषणा गरिसकेका छन्। विवाद समाधानका लागि यसैबीच बालुवाटारमा विशेष महाधिवेशन पक्षधर र संस्थापन पक्षका नेताहरूबीच वार्ता जारी छ।

संस्थापन पक्षीय नेताहरूले विशेष महाधिवेशनलाई अवैधानिक भन्दै आएका छन् भने विशेष पक्षधरहरूले भने पार्टीको नीति र नेतृत्व चयन गर्ने प्रक्रियाबाट पछि नहट्ने स्पष्ट पारेका छन्।

कांग्रेसभित्र जारी यो शक्ति संघर्षले पार्टीको भावी दिशा, संगठनात्मक एकता र राजनीतिक स्थायित्वमा गम्भीर प्रश्न खडा गरेको छ।