काठमाडौं । नेपाली कांग्रेसको दोस्रो विशेष महाधिवेशनअन्तर्गत आज बन्दसत्र सुरु हुँदैछ। आइतबार उद्घाटन भएको महाधिवेशनको बन्दसत्रका लागि प्रतिनिधिहरू धमाधम भृकुटीमण्डप प्रवेश गर्न थालेका छन्।

बिहानैदेखि भृकुटीमण्डप परिसरमा कांग्रेस महाधिवेशन प्रतिनिधि तथा कार्यकर्ताहरूको उल्लेख्य चहलपहल देखिएको छ। देशभरबाट आएका प्रतिनिधिहरू आ–आफ्नो परिचयपत्रसहित बन्दसत्र स्थल प्रवेश गर्दैछन् भने नेतृत्व तहका नेताहरू आन्तरिक छलफलमा व्यस्त देखिन्छन्।

महाधिवेशन प्रचार–प्रसार समितिका अनुसार बन्दसत्रको सुरुआत विशेष महाधिवेशन सञ्चालनसम्बन्धी कार्यविधि तयार गर्ने कार्यतालिकाबाट हुनेछ। त्यसपछि नौ वटा समूह निर्माण गरी चार वटा प्रमुख विषयमा नीति मन्थन गरिने कार्यक्रम रहेको छ।

पार्टीभित्र देखिएको आन्तरिक मतभेदका बीच भइरहेको यो बन्दसत्रलाई कांग्रेसको आगामी राजनीतिक दिशा र संगठनात्मक निर्णयका हिसाबले महत्वपूर्ण मानिएको छ। बन्दसत्रबाट आउने निष्कर्षप्रति कांग्रेस नेतृत्वदेखि आम कार्यकर्तासम्मको चासो केन्द्रित भएको छ।