काठमाडौँ । नेपाली राजदूत डा. शिवमाया तुम्बाहाम्फेले दक्षिण कोरियामा आफ्नो जिम्मेवारी सम्हालेको पहिलो वर्ष (७ जनवरी २०२५–७ जनवरी २०२६) सफलतापूर्वक पूरा गरेका छन्। यस अवधिमा राजदूतावासले शिक्षा, श्रम, लगानी, पर्यटन, मानविक सहयोग र सांस्कृतिक आदानप्रदानमा उल्लेखनीय काम गर्दै दुई देशबीचको सम्बन्धलाई अझ सुदृढ बनाएको छ।

राजदूतावासमार्फत कोरियामा अध्ययनरत १५ हजारभन्दा बढी नेपाली विद्यार्थीको समस्या सुन्ने, भिसा प्रक्रियामा सहजता ल्याउने, छात्रवृत्ति र अध्ययनपछि रोजगारीका अवसरको सुनिश्चितता गर्न पहल गरिएको छ। नेपाली प्राध्यापकहरूसँगको बैठकमार्फत कोरियाली शिक्षण प्रणाली र नेपालमा लागू गर्न सकिने विधिहरूको विषयमा छलफल गरिएको थियो।

मानवीय सहयोगमा पनि दूतावास सक्रिय देखिएको छ। कोरियामा दुःख्द निधन भएका ३१ नेपाली कामदारको शव नेपाल पठाइएको छ भने मानसिक स्वास्थ्य समस्या भएकाहरूलाई मनोसामाजिक परामर्श र उपचारमा सहयोग गरिएको छ। ‘सुनौं सिकौं’ कार्यक्रममार्फत दैनिक गुनासा र जिज्ञासाहरू समाधान गर्ने कार्य भइरहेको छ।

त्यस्तै, कोरियाली कम्पनी र सरकारी निकायसँगको समन्वयमार्फत नेपालमा जलविद्युत्, स्मार्ट सिटी, रेल पूर्वाधार, कृषि र पर्यटन क्षेत्रमा लगानी प्रवद्र्धन गरिएको छ। सांस्कृतिक क्षेत्रमा पनि ‘नेपाल डे २०२५’, उल्सान फिल्म फेस्टिभल र बहुसांस्कृतिक महोत्सवमार्फत नेपालको जीवन्त संस्कृति, लोकसङ्गीत, नृत्य र हिमालको सुन्दरता विश्वमाझ प्रस्तुत गरिएको छ।

राजदूतावासबाट राहदानी, भिसा, विवाह–दर्ता, जन्म–दर्ता, नागरिकता र अन्य कन्सुलर सेवा प्रदान गरी १९,२७४ नेपाली लाभान्वित भएका छन्। यसरी डा. तुम्बाहाम्फे नेतृत्वमा कोरियामा नेपालको कूटनीति, सामाजिक, शिक्षा र सांस्कृतिक सम्बन्धलाई गतिशील बनाउँदै देशको सम्मान र हित सुनिश्चित गरिएको छ।