काठमाडौं । आगामी राष्ट्रिय सभा निर्वाचनका लागि नेपाली कांग्रेस, नेकपा एमाले र नेपाली कम्युनिस्ट पार्टी (नेकपा) बीच चुनावी तालमेलको अन्तिम तयारी तीव्र बनेको छ। प्रमुख तीन दलबीच सिट बाँडफाँट र रणनीतिक सहकार्यबारे अनौपचारिक तथा औपचारिक छलफल अन्तिम चरणमा पुगेको नेताहरूले बताएका छन्।

स्रोतका अनुसार १८ निर्वाचित सिटमध्ये कांग्रेस र एमालेले ७–७ सिट तथा नेकपाले ४ सिट पाउने मोडेलमा छलफल अघि बढेको छ। यस विषयमा एमाले अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’बीच प्रत्यक्ष संवाद भइसकेको छ भने कांग्रेस–एमाले नेतृत्वबीच पनि निरन्तर समन्वय भइरहेको छ।

कांग्रेस संसदीय दलका नेता कृष्णप्रसाद सिटौलाले राष्ट्रिय सभामा अंकगणितका कारण रणनीतिक तालमेल आवश्यक रहेको बताएका छन्। उनका अनुसार मतभारको यथार्थका आधारमा प्रमुख दलहरू मिलेर अघि बढ्नु आजको बाध्यता हो।

नेकपाले भने प्रमुख शक्ति मिलेर जाने हो भने मतभारका आधारमा सिट बाँडफाँट गरी सर्वसम्मत निर्वाचन गराउने प्रस्ताव अघि सारेको छ। तर कांग्रेस–एमाले मात्रै मिलेर चुनाव लडेमा सबै प्रदेशमा उम्मेदवार उठाउने अडान पनि नेकपाले राखेको छ।

बुधबार उम्मेदवारी दर्ताको कार्यतालिका रहेकाले सोमबार रातिसम्म सहमति टुंग्याउने प्रयास भइरहेको छ। आगामी ११ माघमा हुने राष्ट्रिय सभा निर्वाचनबाट १८ सदस्य निर्वाचित हुनेछन्, जसको कार्यकाल २० फागुनमा सकिँदैछ।