विराटनगर । सुनसरीको कोशी गाउँपालिका–१ लौकही नजिक सशस्त्र प्रहरीको गोली लागेर ४५ वर्षीय विजय साहको मृत्यु भएको छ।

बुधबार राति करिब १ बजे भारतबाट सामान ल्याउँदै सिटी सफारीमा आउँदै गरेका साह सशस्त्र प्रहरी टोलीसँग जम्काभेट भएपछि गोली लागेर घटनास्थलमै मृत्यु भएको प्रहरी स्रोतले जनाएको छ। सिटी सफारीबाट चिनी, सरफ, चकलेटलगायतका सामग्री फेला परेका छन्।

सशस्त्र प्रहरीले तस्करी नियन्त्रणका क्रममा तस्कर समूहबाट पहिला गोली चलेपछि जवाफी फायर गरिएको दाबी गरेको छ। तर स्थानीयले भने लेनदेन विवादमा सशस्त्रले एकतर्फी रूपमा गोली प्रहार गरेको आरोप लगाएका छन्।

घटनापछि स्थानीयले पूर्व–पश्चिम राजमार्ग अवरुद्ध गर्दै दोषीमाथि कारबाही र क्षतिपूर्तिको माग गरेका छन्। स्थिति नियन्त्रणमा लिन प्रहरीले अश्रुग्यास र हवाई फायर गरेको छ। घटनाबारे अनुसन्धान भइरहेको प्रहरीले जनाएको छ।