काठमाडौं। पोखराको लिचीबारी जग्गा प्रकरणमा घुस लिएको अभियोगमा विशेष अदालतले पूर्व संघीय मामिला तथा सामान्य प्रशासन मन्त्री राजकुमार गुप्तालाई थुनामा राखी पुर्पक्ष गर्न आदेश दिएको छ।

अध्यक्ष सुदर्शनदेव भट्ट तथा न्यायाधीशद्वय डिल्लीरत्न श्रेष्ठ र विदुर कोइरालाको इजलासले गुप्ताविरुद्ध परेको घुससम्बन्धी उजुरी, अडियो संवाद र त्यसको फरेन्सिक प्रतिवेदन, संलग्न व्यक्तिहरूबीचको फोन सम्पर्क विवरण, पोखराको होटल बसाइ र मन्त्रालयबाट तिरिएको बिल, बैंक खातामार्फत भएको रकम लेनदेन तथा नगद गन्दै गरेको फोटो प्रमाणलाई आधार मानेको हो।

अदालतले इजलासमै दिइएको बयान अन्य प्रमाणसँग नमिलेको ठहर गर्दै विशेष अदालत ऐन, २०५९ को दफा ७(ङ) अनुसार गुप्तालाई तत्काल थुनामा राख्नुपर्ने पर्याप्त कारण देखिएको जनाएको छ।