काठमाडौं । नेपाली कांग्रेसले प्रतिनिधिसभा निर्वाचनअन्तर्गत समानुपातिकतर्फ निर्वाचन आयोगमा बुझाएको बन्दसूचीमा देशका १३ जिल्लाको प्रतिनिधित्व नपरेको पाइएको छ। कांग्रेसको बन्दसूचीमा ७७ मध्ये ६४ जिल्लाबाट मात्रै उम्मेदवार समावेश छन्।

प्रदेशगत रूपमा हेर्दा सबैभन्दा बढी बागमती प्रदेशका चार जिल्ला-ललितपुर, सिन्धुपाल्चोक, काभ्रेपलाञ्चोक र चितवन-बाट कसैलाई पनि उम्मेदवार बनाइएको छैन। यस्तै कोशी र गण्डकी प्रदेशका तीन–तीन जिल्ला, लुम्बिनीका दुई तथा कर्णाली प्रदेशको एक जिल्ला बन्दसूचीबाट बाहिर परेका छन्।

कोशी प्रदेशका धनकुटा, ओखलढुंगा र खोटाङ, गण्डकीका मनाङ, म्याग्दी र लमजुङ, लुम्बिनीका पूर्वी रूकुम र प्युठान तथा कर्णालीको जुम्लाबाट कांग्रेसले समानुपातिक उम्मेदवार सिफारिस गरेको छैन।

मधेश र सुदूरपश्चिम प्रदेशका भने सबै जिल्लाबाट प्रतिनिधित्व भएको देखिन्छ। मधेश प्रदेशमा धनुषाबाट सबैभन्दा बढी ६ जना बन्दसूचीमा परेका छन्। धनुषाकै डा. चन्द्रमोहन यादवको नाम बन्दसूचीमा दोहोरिएको छ। उनी पूर्वराष्ट्रपति डा. रामवरण यादवका छोरा हुन्।

सुदूरपश्चिमका नौ जिल्लामध्ये कैलाली र कञ्चनपुरबाट दुई–दुई जना तथा बाँकी सात जिल्लाबाट एक–एक जनाको नाम बन्दसूचीमा समावेश गरिएको छ।