काठमाडौं । नेकपा (एमाले) का नेता गोकुल बास्कोटाले समसामयिक राजनीतिक घटनाक्रम र शक्ति केन्द्रको भूमिकालाई संकेत गर्दै आज देखिएका ‘नयाँ’ र हिजोका ‘नयाँ’ पात्रहरूको मूल जरो एउटै हुन सक्ने टिप्पणी गरेका छन्।

सामाजिक सञ्जाल फेसबुकमार्फत धारणा सार्वजनिक गर्दै नेता बास्कोटाले आज र हिजोका नयाँ पात्रहरूको स्वर र प्रवृत्ति मिल्न गए पनि त्यसलाई अनौठो मान्न नहुने बताएका छन्। उनका अनुसार यसको कारण एउटै कथा लेखक हुनु हो, जहाँ समय, सन्दर्भ र पात्र मात्रै फरक हुन्छन्।

बास्कोटाले शक्ति केन्द्रले आफ्ना नयाँ मिसन पूरा गर्न सधैँ नयाँ पात्रको खोजी गर्ने गरेको उल्लेख गरेका छन्। उनले उदाहरण दिँदै भनेका छन्, जसरी कुनै मालिकले हरेक वर्ष बढी नाफाका लागि नयाँ नोकर खोज्छ, ठीक त्यसैगरी शक्ति केन्द्रले पनि आफ्ना उद्देश्यअनुसार नयाँ पात्र अघि सार्ने गर्छ।

उनको यो अभिव्यक्तिलाई पछिल्लो समय देखिएका राजनीतिक गतिविधि, नयाँ नेतृत्वको उदय र बाह्य प्रभावसँग जोडेर अर्थपूर्ण संकेतका रूपमा हेरिएको छ। एमाले नेता बास्कोटाको उक्त धारणा समसामयिक राजनीतिमा चलिरहेका बहससँग गाँसिएर विश्लेषण हुन थालेको छ।

बास्कोटाको फेसबुक स्ट्याटस यस्तो छ :
“मूल जरो खोज्दै जाँदा आजका नयाँ र हिजोका नयाँहरूको कल नसो एउटै नपरोस्। परेछ भने पनि खासै अनौठो यसर्थ हुँदैन कि कथा लेखक उनै हुन—केवल समय, सन्दर्भ र पात्र फरक हुन। शक्ति केन्द्र उसको नयाँ मिसनका लागि नयाँ पात्र खोज्छ, ठिक त्यसै गरी—जसरी मालिक हरेक साल बढी नाफाका लागि नयाँ नोकर खोज्छ।”