काठमाडौं। धरान उपमहानगरपालिकाका मेयर हर्क साम्पाङले हालै राष्ट्रिय स्वतन्त्र पार्टी (रास्वपा) मा सामेल भएका कुलमान घिसिङलाई लक्षित गर्दै कडा टिप्पणी गरेका छन्।

सामाजिक सञ्जालमा सक्रिय साम्पाङले पछिल्लो स्ट्याटसमा कुलमानप्रति कटाक्ष गर्दै लेखेका छन्, “उज्यालो नेपाल पोइला गयो रे हो ? यस्ताहरूले देशको नेतृत्व गर्ने रे ? एक महिनासम्म नि आफ्नो विचारमा टिक्न नसक्नेहरूलाई भोट होइन बहिष्कार गर्नु पर्छ है नेपाली हो !”

साम्पाङ काठमाडौं महानगरपालिकाका मेयर बालेन्द्र शाह, रास्वपा सभापति रवि लामिछाने र ऊर्जा क्षेत्रमा चर्चित कुलमान घिसिङविरुद्ध पनि बेला–बेला कडा अभिव्यक्ति दिँदै आएका छन्। रवि, बालेन र कुलमानबीच एकताको चर्चा सुरु भएदेखि नै उनले त्यसको विरोध गर्दै सामाजिक सञ्जालमा लगातार आलोचनात्मक स्ट्याटस र भिडिओ पोस्ट गर्दै आएका छन्।

सोमबार मात्रै कुलमान घिसिङ संरक्षक रहेको उज्यालो नेपाल पार्टी रास्वपामा समाहित भएको थियो। त्यसलगत्तै हर्क साम्पाङको उक्त टिप्पणी सार्वजनिक भएको हो।