काठमाडौं। गुरुङ समुदायले आज तमु ल्होसार पर्व मनाउँदै पुरानो वर्षलाई बिदाइ गरी नयाँ वर्षको स्वागत गरेका छन्। ‘ल्हो’ को अर्थ वर्ष र ‘सार’ को अर्थ फेरिनु भएकाले वर्ष फेरिने दिनलाई तमु ल्होसार भनिन्छ।

तमु ल्होसार सूर्यको किरणसँग सम्बन्धित पर्व मानिन्छ। गुरुङ बाहुल्य रहेका लमजुङ, गोरखा, तनहुँ, स्याङ्जा, मनाङ, कास्की, पर्वतलगायत जिल्लामा पुस महिनामा यो पर्व मनाउने चलन छ। पुस १५ पछि रात छोटिँदै जाने भएकाले पनि यस पर्वलाई विशेष महत्त्व दिने गरिन्छ।

तमु ल्होसारको अवसरमा आज सरकारले देशभर सार्वजनिक बिदा दिएको छ। यस अवसरमा काठमाडौंको टुँडिखेलमा गुरुङ समुदायले परम्परागत वेशभूषा, सांस्कृतिक नृत्य र परिकारसहित विशेष कार्यक्रम आयोजना गरेका छन्। आइतबारदेखि सुरु भएको ल्होसार महोत्सवमा हजारौँको सहभागिता रहेको छ।