काठमाडौं । निर्वाचन आयोगले आगामी प्रतिनिधि सभा निर्वाचनका लागि मतपत्र छपाइ प्रक्रिया सुरु गर्ने तयारी गरेको छ। आयोगले पहिलो चरणमा समानुपातिकतर्फका र त्यसपछि प्रत्यक्षतर्फका मतपत्र छाप्ने जनाएको छ।

मतपत्र भक्तपुरको सानोठिमीस्थित जनक शिक्षा सामग्री केन्द्रको छापाखानामा छापिनेछ। यसअघि नै आयोगले पुस १६ गतेदेखि मतपत्र छपाइ सुरु गर्ने तालिका निर्धारण गरिसकेको छ।

निर्वाचन आयोगका सहायक प्रवक्ता कुलबहादुर जीसीका अनुसार समानुपातिकतर्फ सहभागी राजनीतिक दल र निर्वाचन चिह्न टुंगो लागिसकेकाले सुरुमा सोतर्फका मतपत्र छापिनेछन्। उनका अनुसार ५८ राजनीतिक दल र ६४ वटा निर्वाचन चिह्न एकिन भइसकेका छन्।

आगामी फागुन २१ गते तोकिएको प्रतिनिधि सभा निर्वाचनका लागि कुल १ करोड ९० लाख ५ हजार ३२४ मतदाता नामावली संकलन तथा अद्यावधिक गरिएको आयोगले जनाएको छ। आयोगको नीतिअनुसार समानुपातिकतर्फ कुल मतदाताको १० प्रतिशत अतिरिक्त मतपत्र छापिनेछ।

समानुपातिकतर्फको मतपत्र छपाइमा २० देखि ३० दिन लाग्ने अनुमान गरिएको छ। उक्त काम सम्पन्न भएपछि प्रत्यक्षतर्फको मतपत्र छाप्ने प्रक्रिया सुरु गरिनेछ।

प्रत्यक्षतर्फको मतपत्र निर्वाचन क्षेत्रअनुसार फरक–फरक हुने सहायक प्रवक्ता जीसीले बताए। उनका अनुसार निर्वाचन क्षेत्रअनुसार दलको सहभागिता र निर्वाचन चिह्न फरक हुने भएकाले उम्मेदवारको अन्तिम नामावली प्रकाशनपछि मात्र प्रत्यक्षतर्फको मतपत्र छापिनेछ।