काठमाडौं । निर्वाचन आयोगले फागुन २१ गते हुने प्रतिनिधिसभा निर्वाचनका लागि राजनीतिक दल र उम्मेदवारलाई सञ्चारमाध्यममार्फत् सीमित रूपमा चुनावी प्रचार–प्रसार गर्न पाउने व्यवस्था गरेको छ।

निर्वाचन आचारसंहिता, २०८२ अनुसार टेलिभिजन, रेडियो तथा एफएमबाट २४ घण्टामा बढीमा चार पटक र प्रत्येक पटक एक मिनेटसम्म प्रचार सामग्री प्रसारण गर्न पाइनेछ। पत्रपत्रिकामा भने एक दिनमा कुनै एउटा पत्रिकामा मात्र चार कोलम × २५ सेन्टिमिटर उचाइसम्म प्रचार सामग्री छाप्न सकिनेछ।

अनलाइन सञ्चारमाध्यमबाट रोडब्लक, ब्यानर, कन्टेन्ट ब्लक लगायतका माध्यम प्रयोग गरी प्रचार गर्न पाइने भए पनि सबै सामग्रीमा ‘सःशुल्क विज्ञापन’ उल्लेख गर्न अनिवार्य गरिएको छ। प्रचार–प्रसारमा लागेको खर्च निर्वाचन खर्च विवरणमा समावेश गर्नुपर्ने र विदेशी सञ्चारमाध्यममार्फत प्रचार गर्न नपाइने आयोगले जनाएको छ।