काठमाडौं । आज काठमाडौं उपत्यकाको न्यूनतम तापक्रम हिजोको तुलनामा घटेको छ। मौसम पूर्वानुमान महाशाखाका अनुसार आज बिहान ५ः४५ बजे गरिएको मापनमा काठमाडौं उपत्यकाको न्यूनतम तापक्रम ५.२ डिग्री सेल्सियस कायम भएको छ। शुक्रबार सोही समयमा उपत्यकाको न्यूनतम तापक्रम ५.४ डिग्री सेल्सियस थियो।

शुक्रबार भने बिहान ८ः४५ बजे पुनः मापन गर्दा न्यूनतम तापक्रम घटेर ५.० डिग्री सेल्सियस पुगेको थियो। आज पनि आधिकारिक न्यूनतम तापक्रम बिहान ८ः४५ बजे पुनः मापन गरिने मौसमविदले बताएका छन्। सो समयमा तापक्रम हालको भन्दा थप घट्ने सम्भावना रहेको छ।

मौसम पूर्वानुमान महाशाखाले काठमाडौँसहित देशका विभिन्न स्थानमा हरेक दिन न्यूनतम र अधिकतम तापक्रम मापन गर्ने गर्दछ। महाशाखाका अनुसार न्यूनतम तापक्रम बिहान ८ः४५ बजे र अधिकतम तापक्रम साँझ ५ः४५ बजे मापन गरिन्छ। सबैभन्दा कम मापन भएको तापक्रमलाई न्यूनतम र सबैभन्दा बढी मापन भएको तापक्रमलाई अधिकतम तापक्रम मानिने मौसम महाशाखाले जनाएको छ।