काठमाडौं । मधेश प्रदेशका मुख्यमन्त्री कृष्णप्रसाद यादवले आज प्रदेशसभामा विश्वासको मत लिँदैछन्। यसका लागि प्रदेशसभा सचिवालयले शुक्रबार अपराह्न ४ बजे प्रदेशसभाको बैठक आह्वान गरेको छ।

प्रदेशसभा सचिव बासुप्रसाद कोइरालाका अनुसार बैठकमा मुख्यमन्त्री यादवले विश्वासको मत माग्ने कार्यसूची तय गरिएको छ। यससम्बन्धी सूचना प्रदेशसभा सचिवालयले सबै सांसदहरूलाई पठाइसकेको छ।

मुख्यमन्त्री यादवले बुधबार प्रदेशसभा सचिवालयलाई पत्राचार गर्दै विश्वासको मतका लागि बैठक बोलाउन अनुरोध गरेका थिए। सोही अनुरोधअनुसार आजको बैठक आह्वान गरिएको हो।

यादव गत मंसिर १९ गते मधेश प्रदेशको मुख्यमन्त्रीमा नियुक्त भएका थिए। मुख्यमन्त्री नियुक्त भएको १५ दिनपछि उनले प्रदेशसभाबाट विश्वासको मत लिन लागेका हुन्।

संविधानअनुसार मुख्यमन्त्रीले पदभार ग्रहण गरेको ३० दिनभित्र प्रदेशसभाबाट विश्वासको मत लिनुपर्ने व्यवस्था छ। सो संवैधानिक प्रावधानअनुसार आज विश्वासको मत लिने प्रक्रिया अघि बढाइएको प्रदेशसभा सचिवालयले जनाएको छ।