भक्तपुर । नेकपा (एमाले)ले ११औँ महाधिवेशनको उद्घाटनका लागि भक्तपुर सल्लाघारीमा १०८ रोपनीमा फैलिएको भव्य मञ्च तयार पारेको छ। काठमाडौं उपत्यकाको कला, संस्कृति र वास्तुकलालाई समेटेर बनाइएको मञ्चको मूल डिजाइन चाँगुनारायण मन्दिरबाट प्रेरित छ। मञ्चमा शंख, चक्र, घन्टा, धरहराको प्रतिरूपसहित उपत्यकाका पुरातन सम्पदाका आकृतिहरू सजिएका छन्।

एमाले भक्तपुर अध्यक्ष वचन देउजाका अनुसार मञ्चको काम अन्तिम चरणमा पुगेको छ। उद्घाटनमा तीन लाखभन्दा बढी सहभागी हुने अनुमान छ। मञ्च परिसरमा १५ हजार चियर र ठूला भिजुअल स्क्रिन जडान गरिएको छ।
सुरक्षा, साउन्ड र पार्किङ व्यवस्थामा प्रविधिमैत्री प्रणाली अपनाइएको छ। गाडी पार्किङका लागि क्यूआर कोडमार्फत स्थान निर्धारण गरिने छ। एमालेको महाधिवेशन उद्घाटन कार्यक्रम शनिबार बिहान ११ बजे सुरु हुने छ।