काठमाडौं । दोस्रो संस्करणको सिद्धार्थ बैंक नेपाल प्रिमियर लिग (एनपीएल) क्रिकेट अन्तर्गत आज दुई खेल हुनेछन्।

पहिलो खेल जनकपुर बोल्ट्स र चितवन राइनोज बीच काठमाडौँको कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट रंगशालामा बिहान ११ः४५ बजे हुनेछ।

चितवन राइनोज यसअघि ४ खेलमा २ जित र २ हारसहित ४ अंक जोडेर प्लेअफको सम्भावना बचाइरहेको छ। चितवनले पहिलो खेलमा कर्णाली याक्सलाई हराएपछि लुम्बिनी लायन्ससँग पराजित भएको थियो। त्यसपछि विराटनगरलाई हराएपछि काठमान्डु गोर्खाजसँग पराजित भयो। आजको खेल जितेमा चितवनको प्लेअफ सम्भावना अझ मजबुत हुनेछ। चितवनले त्यसपछि सुदूरपश्चिम रोयल्स र पोखरा एभेन्जर्ससँग खेल्न बाँकी छ। यदि चितवन सबै खेल जित्छ भने प्लेअफमा स्थान पक्का हुनेछ।

अर्कोतर्फ जनकपुर बोल्ट्स ४ खेलमा कुनै पनि खेल जित्न सकेको छैन। जनकपुरले काठमान्डु गोर्खाज, विराटनगर किङ्स, पोखरा एभेन्जर्स र सुदूरपश्चिम रोयल्ससँग पराजित भएको छ। आजको खेल जितेमा जनकपुरको प्लेअफ सम्भावना भने गणितीय हिसाबले जीवित रहनेछ। पराजित भएमा जनकपुर प्रतियोगिताबाट बाहिरिनेछ।

अर्को खेल अपराह्न ४ बजे हुने छ, जसमा पोखरा एभेन्जर्स र कर्णाली याक्स भिड्नेछन्। पोखरा र कर्णालीका लागि पनि यो खेल महत्त्वपूर्ण छ। पोखराले ४ खेलमा १ जित मात्र निकालेको छ, र यो खेल जितेर प्लेअफको यात्रा सहज बनाउन चाहन्छ। कर्णाली याक्सले पनि ५ खेलमा १ मात्र जितेको छ र यदि आजको खेलमा पराजित भएमा उनीहरू प्रतियोगिताबाट बाहिरिनेछन्।