मधेश प्रदेश । नेकपा (एमाले) मधेश प्रदेशले संगठन सुदृढीकरण र सूचना व्यवस्थापनलाई आधुनिक बनाउने उद्देश्यसहित नयाँ आधिकारिक वेबसाइट cpnumlmadhesh.org सार्वजनिक गरेको छ। उक्त वेबसाइट सोमबार जनकपुरमा प्रदेश अध्यक्ष चण्डेश्वर मण्डलले उद्घाटन गरेका छन्।

पार्टीका अनुसार यो साइट UML मधेश प्रदेशको दीर्घकालीन ‘डिजिटल रूपान्तरण परियोजना’को आधारभूत ढाँचा मानिन्छ। वेबसाइटमार्फत रियल–टाइम अपडेट, जनप्रतिनिधिहरूको विस्तृत प्रोफाइल, नीति–कार्यक्रमहरूको डिजिटल पहुँच, अनलाइन सदस्यता तथा स्वयंसेवक दर्ता सुविधा, जनगुनासो दर्ता प्रणाली तथा आठै जिल्लाका डिजिटल मिनी–साइट उपलब्ध हुनेछन्।

नेताहरूले नयाँ प्लेटफर्मलाई मधेशमा राजनीतिक टेक्नोलोजीको नयाँ युगको सुरुवातका रूपमा व्याख्या गर्दै यसले UMLलाई अझ संगठित, पारदर्शी, डेटा–आधारित र जनमुखी बनाउने बताए।

सार्वजनिक कार्यक्रममा प्रेस चौतारी नेपालका केन्द्रीय सदस्य अवदेश कामतसहित पार्टीका विभिन्न नेता तथा पत्रकारहरूको उपस्थिती रहेको थियो।