रौतहट । रौतहटमा विद्यालय बसको ठक्कर लागेर दुई वर्षीय बालकको दुःखद मृत्यु भएको छ।
माधवनारायण नगरपालिका–३ सखुआवास्थित ओम एकेडेमीको बसले जयनगर क्षेत्रमा शुक्रबार बिहान दुर्घटना गराएको हो।

दुर्घटनामा गरुडा नगरपालिका–१ जयनगरका रंजन साहका दुई वर्षीय छोरा आदित्य कुमार साह को घटनास्थलमै मृत्यु भएपछि परिवार र स्थानीयवासी मर्माहित बनेका छन्।

जिल्ला प्रहरी कार्यालय रौतहटका प्रवक्ता डीएसपी विष्णु प्रदीप बस्यालका अनुसार प्रदेश–३–००१ ख १७२६ नम्बरको विद्यालय बस जयनगरबाट मानपुरतर्फ जाँदै गर्दा बालकलाई ठक्कर दिएको थियो।

दुर्घटनापछि बस नियन्त्रणमा लिएपनि चालक फरार रहेको र उनको खोजी जारी रहेको प्रहरीले जनाएको छ।
मृतक बालकको शव पोष्टमार्टमका लागि प्रादेशिक अस्पताल गौर पठाइएको छ।

प्रहरीले घटनाबारे आवश्यक अनुसन्धान सुरु गरेको जनाएको छ।