काठमाडौं। नेपाल प्रिमियर लिग (एनपीएल)को दोस्रो संस्करणअन्तर्गत आज दुई खेल हुने भएका छन् । कीर्तिपुरस्थित त्रिवि अन्तर्राष्ट्रिय क्रिकेट रंगशालामा बिहान ११:४५ बजे चितवन राइनोज र कर्णाली याक्स आमनेसामने हुनेछन् । दोस्रो खेलमा विराटनगर किंग्स र पोखरा एभेन्जर्स भिड्नेछन् ।

चितवनलाई कुशल मल्लले नेतृत्व गर्नेछन् भने कर्णालीको कप्तानी सोमपाल कामीले सम्हाल्नेछन् । विराटनगरको नेतृत्व सन्दीप लामिछानेका हातमा रहनेछ भने पोखराका कप्तान कुशल भुर्तेल हुनेछन् । गत संस्करणमा चितवन र कर्णालीबीच भएका दुवै खेल कर्णालीले जितेको थियो । त्यसैगरी विराटनगर र पोखराबीचको खेलमा पोखरा विजयी भएको थियो । यस संस्करणमा पनि चारै टोली सुखद सुरुआतको लक्ष्यसहित मैदान उत्रनेछन् ।

यसअघि सोमबार भएको खेलमा काठमाडौं गोर्खाजले जनकपुर बोल्ट्सलाई पाँच विकेटले पराजित गर्दै विजयी सुरुआत गरेको थियो । क्यानद्वारा आयोजित प्रतियोगिताको फाइनल मंसिर २७ मा हुनेछ भने विजेताले रु एक करोड १० लाख प्राप्त गर्नेछ । सबै खेल अनलाइनखबर डटकममार्फत लाइभ प्रसारण हुनेछ ।