काठमाडौं । बंगलादेशको अदालतले पूर्वप्रधानमन्त्री शेख हसिनालाई मानवताविरुद्धको अपराधमा दोषी ठहर गर्दै सजाय सुनाएको छ। इन्टरनेसनल क्राइम ट्रिब्यूनलले हसिनामाथि लागेका पाँचवटा आरोपमा सुनुवाइ गर्दै हत्या, मानवता विरुद्धको अपराध र अपराध रोक्न नसक्नु जस्ता महत्वपूर्ण आरोप पुष्टि गरेको छ।

गत वर्ष विद्यार्थी–नेतृत्वमा भएको विद्रोहमाथि दमनकारी कारबाहीको आदेश दिएकी हसिनामाथि महिनौँसम्म चलेको मुद्दाको सोमबार अन्तिम फैसला सार्वजनिक गरिएको हो।

फैसलापछि देशभर हिंसा फैलिएको र सरकारले उच्च सतर्कता (हाई अलर्ट) को घोषणा गर्दै ढाकामा १५,००० प्रहरी परिचालन गरेको छ। आवश्यक परे उनीहरूले प्रदर्शनकारीहरूमाथि गोली चलाउने आदेश पाएका छन्। फैसलापछि ढाकामा दुईवटा बसमा आगजनीसमेत भएको रिपोर्ट छ।

फैसला अघि हसिनाले आफूविरुद्धका आरोपहरू झूटो भएको र यस्ता फैसलालाई बेवास्ता गर्ने बताएकी थिइन्। उनले आफ्ना समर्थकहरूले स्वस्फूर्तरूपमा विरोध प्रदर्शन गरेको र अवामी लिगको जरा–जरा गाउँदेखि उठेको पार्टी भएको दाबी गरिन्।

शेख हसिनाले भनेकी छिन्, “यो भ्रष्ट, उग्रवादी र हत्यारा युनुस र उनका सहयोगीहरूलाई बंगलादेश कसरी फेरिन्छ भनेर जनताले देखाउनेछ। न्याय जनता स्वयं गर्छन्।”