अदानचुली (हुम्ला) । हुम्लामा विद्युत् पोल बोक्दै गरेको एक ट्याक्टर दुर्घटना हुँदा चालकको मृत्यु भएको छ भने एक जना घाइते भएका छन्।

बाजुराबाट हुम्लाको पिपलमुडास्थित विद्युत् सबस्टेसनका लागि पोल ढुवानी गरिरहेको लु ५ त १२३७ नम्बरको ट्याक्टर सोमबार राति दुर्घटनामा परेको हो। ट्याक्टर मुगु जिल्लाको सोरु गाउँपालिकाको केन्द्रतर्फ जाँदै गरेको बेला दुर्घटना भएको प्रहरीले जनाएको छ। दुर्घटनामा बाजुरा, गौमुल गाउँपालिका–३ का अन्दाजी २४ वर्षीय सुरेश रोकायाको घटनास्थलमै मृत्यु भएको सोरुकोट प्रहरी चौकीका प्रहरी सहायक निरीक्षक बलवीर लावडले जानकारी दिए।

लावडका अनुसार, उकालोमा ट्याक्टरको ब्रेक फेल हुँदा करिब ७०० मिटर तल खसेर दुर्घटना भएको हो।
सो घटनामा हुम्ला, अदानचुली–२ का २८ वर्षीय रेशम भण्डारी सख्त घाइते भएका छन्। उनलाई उपचारका लागि जिल्ला अस्पताल मुगु लगिएको प्रहरीले जनाएको छ। ट्याक्टरमा चालक रोकाया र सहचालक भण्डारी मात्र सवार रहेको पनि प्रहरीले पुष्टि गरेको छ।