काठमाडौं । काठमाडौं उपत्यका अपराध अनुसन्धान कार्यालयको टोलीले बिहीबार काठमाडौंमा एक जनालाई ग्यास गनसहित पक्राउ गरेको छ।

पक्राउ पर्नेमा कैलाली घर भई काठमाडौंको सहयोगी नगर बस्ने २१ वर्षीय मनोज ढुंगाना रहेका छन्। प्रहरीका अनुसार उनलाई नियन्त्रणमा लिँदा एक ग्यास गन, एक मोबाइल, र प्रहरीको भीड नियन्त्रणका लागि प्रयोग हुने लेगगार्ड बरामद भएको छ। ग्यास गन प्रायः भीड नियन्त्रणमा प्रयोग गरिन्छ र यसले अश्रुग्यास फ्याँक्न सक्छ।

प्रहरीले विशेष सूचनाको आधारमा खटिएको टोलीले ढुंगानालाई पक्राउ गरी थप अनुसन्धानको लागि जिल्ला प्रहरी परिसर काठमाडौं पठाएको छ। प्रहरीका अनुसार भदौ २४ गते देशभरि १,२०० भन्दा बढी हातहतियार लुटिएका थिए। यसमध्ये अधिकांश हतियार फिर्ता भइसकेको बताइएको छ, यद्यपि सुरक्षा निकाय र गृह मन्त्रालयले यकिन तथ्यांक सार्वजनिक गरेका छैनन्।