काठमाडौं । भारतको बिहार राज्यमा विधानसभा चुनावको पहिलो चरण अन्तर्गत आज बिहानदेखि मतदान सुरु भएको छ।

कुल २४३ सिटमध्ये पहिलो चरणमा १८ जिल्लाका १२१ सिटका लागि बिहान ७ बजेदेखि मतदान भइरहेको छ, जो साँझ ६ बजेसम्म चल्नेछ। यस चरणमा राजनेता, कलाकार र चर्चित व्यक्तित्वहरू प्रतिस्पर्धामा छन्। तेजस्वी यादव, तेजप्रताप यादव, अनन्त सिंह, मैथिली ठाकुर, भोजपुरी गायक रितेश पाण्डे, फिल्म स्टार खेसारी लाल यादव र ओसामा शाहबलजस्ता उम्मेदवार चर्चामा रहेका छन्।

करीब ३ करोड ७५ लाख मतदाताले मतदान गर्ने अपेक्षा गरिएको छ। पहिलो चरणमा १,३१४ उम्मेदवार प्रतिस्पर्धामा छन्। मतदान पटना, वैशाली, नालन्दा, दरभंगा, सारण, सिवान, मुजफ्फरपुरसहित १८ जिल्लामा भइरहेको भारतीय सञ्चारमाध्यमहरूले जनाएका छन्।

निर्वाचनका लागि ४५ हजार ३४१ मतदान केन्द्र स्थापना गरिएको छ भने करिब ४ लाख ५० हजार सुरक्षाकर्मी परिचालन गरिएको छ। मतगणना नोभेम्बर १४ मा हुने तय गरिएको छ।